Irutxuloko Hitza

intxaurrondo » hirigintza

60 bat toki izan ditzake Letamanen lekuan egingo duten aparkalekuak

Lourdes Enean 36 bat etxebizitza eraikiko dituzte

xabier etxabe

Letaman gaztetxea zegoen lekuan egingo duten aparkalekuak 60 bat autorentzako tokia izango du. Jorge Letamendiak iragarri duenez, behin betiko tokiak zehaztuko dituzte auzotarren eskaera jakin eta gero.

Herenegun bota zuten lurrera Letaman. Jorge Letamendiak nabarmendu zuen auzotarrekin ados jarri direla eta Larrotxene kultur etxea zabaltzen dutenean IZBE Intxaurrondo Zaharreko Bizilagunen Elkartearentzat eta gazteentzat lokalak jarriko dituztela kultur etxean. Letaman lurrera botatzean ez zela inolako istilurik izan azpimarratu zuen Hirigintza zinegotziak.

Letamendiak gogora ekarri zuen, bestalde, Letamaneko proiektua Lourdes Enearenarekin lotuta dagoela. Lourdes Enea Garro eta Zubiaurre zubien arteko lursaila da. Urtetan kongregazio batena izan zen eta frontoi txikia, kirol gunea eta 2.000 metro karratuko gune berdea dago.

Lourdes Enean, 36 bat etxe

Hain zuzen ere, Lourdes Enean etxebizitzak egingo dituzte eta hirigintza operazio horrek Udalari emango dizkion etekinak Larrotxe zabaltzera eta Letamanen tokian plaza eta aparkalekua egitera bideratuko ditu. 36 etxebizitza egingo dituzte Lourdes Enean eta haietatik 20, 65 urtetik gorakentzat.